- في البداية نرحب بحضرتك في موقع وجريدة شمس مصر الإخبارية.
أهلًا بيكي وأنا مبسوط بهذا الحوار.
- ممكن تعرفنا بحضرتك؟
المطرب أحمد سيد
- متى كانت بدايتك مع الغناء؟
بدايتي أنا كنت بغني في المدرسة، وكنت بغني في البيت عندي قبل ما أغني كمان كنت بلعب كورة
- كيف اكتشفت هذه الموهبة؟ هل كانت صدفة، أم حب للغناء منذ الصغر؟
كنت دايمًا بسمع أغاني وبرددها سواء في البيت أو مع أصحابي، وفجأة قالي صديقي غني الأغنية دي، فبدأت اقتنع بنفسي وصوتي بدأ يعجب الناس، وكتبت في موبايلي أحمد سيد الفنان، وقالتلي والدتي رحمة الله عليها جيب أخوك الصغير من المدرسة فقولتلها تمام وروحت أجيبه، ولقيت المدرس بيقولي وريني موبايلك شبه بتاعي، وقالي أنت كاتب الفنان بتعمل أي يعني كنت كاتبها في الخلفية الفنان أحمد سيد، فقولتله أنا بغني ونفسي أعمل حاجة، قالي طيب كويس سمعني صوتك لو عجبني هدلك على أول فرقة تغني فيها، المهم غنيت وعجبه الحمد لله ودلني على أول فرقة غنيت فيها وهي فرقة مسرح بالون تحت سن الـ ١٨، ثم بعد ذلك اتنقلت لمركز شباب الجزيرة، ودار الأوبرا المصرية، وفرقة سيد درويش، والموسيقار الكبير هاني شنودة (فرقة المصريين)، وبعد ذلك أرب أيدل.
اقرأ أيضًا/|شمس مصر|.. أشرف عبد الباقي يحتفل بزفاف ابنته
- أوصفلنا، أول ظهور لك على الساحة، وكيف كانت بدايتك مع هذا المشوار؟
أنا أول حفلة عملتها مكنش عندي خبرة خالص، وكنت بغني أرمي حمولك عليا لهيثم شاكر، فغنيتها من طبقة تانية خالص وكان في كورال بيغني ورايا فكان يوم صعب شوية بس مع الوقت تأكدت إن اللحظة دي اللي خلتني اجتهد أكتر، ومطلعش غير وأنا مستعد جدًا، فدي كانت نقطة البداية بالنسبة ليا، ويكون عندي دايمًا الخبرة مع الوقت.
- من كان أكثر الأشخاص داعمًا لك في هذا المشوار؟
الأشخاص اللي دعموني في مشواري هتستغربوا من إجابتي، كل حد خلاني أحبط وكان عاوزني أبعد عن حلمي وقالي أنت متنفعش، دا إداني إصرار أكتر أني أشتغل على نفسي وأثبت لكل الناس أني مش زي ما أنتوا بتقولوا، دايمًا بيكون في موهبة حقيقة صاحبها شايف حاجة اللي قدامه غصب عنه مش شايفها، ومحتاج وقت عشان يوصل ويثبت نفسه للناس ويعرفوه، فأنا بشكر كل الناس اللي إداتني طاقة سلبية وخلتني أحبط، لأن دا إداني دافع أطور من نفسي أكتر وأكتر وأثبت للعالم إني حاجة تانية
- لا يوجد نجاح بدون عقبات، فما هي الصعوبات التي واجهتك في بداية مشوارك؟ كيف واجهتها؟ وهل أثرت عليك بالجانب السلبي أم الإيجابي؟
هي دي العقبات كما ذكرت والعقبات اللي كانت بتقف قدامي وهي أن حد يقفل الباب في وشك وأنت رايح مشوار مهم وحد يقولك لأ مش هتقابل كذا، دا من ضمن العقبات اللي الإنسان بيقع فيها في مشواره كل ما يمشي يلاقي ناس توقعه مش عوزاه يكون موجود
اقرأ أيضًا/|شمس مصر|.. طرح الفيديو الترويجي لمسلسل The Tourist
- أفضل مغني بالنسبة لك؟
كل مغني وليه أسلوبه ومدرسته وطريقته، مدحت صالح فنان جميل وأنا بحبه جدًا ودايمًا بغنيله والكينج محمد منير مدرسة كبيرة جدًا وانا بحبه جدًا وبغنيله برضو وأم كلثوم وعبد الحليم ومحمد عبد الوهاب مفيش حد معين.
- سبق لك القيام بدويتو مع أحد الفنانين؟
أنا عملت دويتو مع الكينج محمد منير "علموني عينيك أسافر"، وعملت دويتو مع الفنان الجميل مصطفى قمر "أغنية سواح"، والفنان الجميل محمد نور "أغنية ده كلام".
- هل تقبل الغناء في الأفراح الشعبية؟
أيوه فعلًا أنا بغني في الأفراح الشعبية، بعمل حفلات وبحيي أفراح الحمد لله.
-ما هي خططك المستقبلية خلال مشوارك الفني؟
الخطط المستقبلية الفترة الجاية إن شاء الله في أغنية هتنزلي قريب، وأول سنة ٢٠٢٢ نزلي أغنية سيبك من الناس دي ألحاني، وكلمات إسلام الخيال، وتوزيع عز الدين، والفترة الجاية إن شاء الله في أغنية اسمها "تركيبة غريبة" هتنزل قريب برضو، دي كلمات وألحان دكتور بكر القاضي، وتوزيع أحمد عاطف، وفي شغل الفترة الجاية مختلف بإذن الله، واتمنى دايمًا التوفيق.
رسالة من المطرب أحمد سيد لجريدة شمس مصر.
أنا بشكر جريدة شمس مصر الإخبارية وبشكركم جدًا على الحوار الجميل ده ونفسي دايمًا أكون عند حسن ظن الجمهور، وإن شاء الله دايمًا نطور من شغلنا ونعمل حاجات تخلي المستمع يتبسط، ونوصله رسالة حقيقة.
شكرًا جزيلًا لحضرتك سعدنا بحوارك كثيرًا.
شكرًا جدًا.
اقرأ أيضًا/|شمس مصر|.. سليم عساف يكشف عن أغنيته الجديدة
